ຄົນລາວສ່ວນຫຼາຍນິຍົມເຄື່ອງນຸ່ງຫົ່ມທີ່ເຮັດຈາກແພໄໝ ບໍ່ວ່າຈະເປັນສິ້ນໄໝ, ເສື້ອໄໝ ເຖິງມັນຈະມີລາຄາສູງ ແຕ່ກໍ່ສົມກັບຄວາມງາມ ວັນນີ້ເຮົາເລີຍມີວິທີຮັກສາແພໄໝຢ່າງຖືກວິທີມາຝາກ ເພື່ອເຮັດໃຫ້ທ່ານມີຜ້າແພໄໝງາມໆໄວ້ໃຊ້ໄດ້ດົນ ເຊິ່ງຈະມີແນວໃດແນ່ນັ້ນເຮົາມາອ່ານພ້ອມກັນເລີຍ1. ຢ່າໃຫ້ໄໝເຂົ້າໃກ້ນ້ຳຫອມ: ເຄມີໃນນໍ້າຫອມຈະເຮັດໄໝເກີດຮອຍດ່າງ ແລະ ເສຍຫາຍບໍ່ຕ່າງຈາກເຄື່ອງປະດັບປະເພດຕ່າງໆ ສະນັ້ນ, ທ່ານໃດມັກໃສ່ນ້ຳຫອມຕ້ອງລະວັງເປັນພິເສດ.
2. ໃຊ້ແຜ່ນແປະດູດເຫື່ອ: ເສື້ອໄໝສ່ວນໃຫຍ່ໜາ ແລະ ບໍ່ລະບາຍອາກາດ ເຮັດໃຫ້ກ້ອງແຂນເກີດເຫື່ອໄດ້ງ່າຍ ແຖມຍັງຖິ້ມຄາບເຫຼືອງ ຄາບດ່າງ ເຮັດໃຫ້ເສຍທັງເສື້ອ, ເສຍທັງບຸກຄະລິກ ເຊິ່ງການໃຊ້ແຜ່ນຊັບເຫື່ອຕິດກ້ອງແຂນສາມາດຊ່ວຍໄດ້ ຖ້າໃຜບໍ່ມີກໍສາມາດໃຊ້ແຜ່ນອະນາໄມບາງໆຕິດແທນກໍແລ້ວກັນ.
3. ຊັກເສື້ອໄໝດ້ວຍຢາສະຜົມເດັກ ຫຼືນ້ຳຢາຊັກຊຸດຊັ້ນໃນດ້ວຍນ້ຳເຢັນ: ບໍ່ຈໍາເປັນຕ້ອງເອົາໄປຊັກຢູ່ຮ້ານທຸກຄັ້ງພໍໃຫ້ສິ້ນເປືອງ ຖ້າເສື້ອໄໝ, ສິ້ນໄໝໂຕໃດບໍ່ມີຂອບ, ມີແຖບເປັນສີກໍສາມາດຊັກເອງໄດ້ດ້ວຍສະບູແຫຼວອ່ອນໆ ຫຼືນ້ຳຢາຊັກຊຸດຊັ້ນໃນ ເພາະມີຄ່າ PH ທີ່ພໍເໝາະພໍດີ ແລະທີ່ສຳຄັນຫ້າມຊັກດ້ວຍນ້ຳອຸ່ນເພາະຈະເຮັດໃຫ້ເນື້ອຜ້າເສຍຮູບຊົງ.
4. ນ້ຳຢາປັບຜ້ານຸ້ມຢ່າໄດ້ເອົາມາແຕະ: ເກັບໄວ້ໃຊ້ກັບຜ້າຊະນິດອື່ນດີກວ່າ ສ່ວນຊຸດໄໝ ແລະຜ້າຢີນຢ່າໄດ້ໃຊ້ເດັດຂາດ ເພາະເຄມີຈາກນ້ຳຢາປັບຜ້ານຸ້ມຈະທຳລາຍໄຍຜ້າປະເພດດັ່ງກ່າວ.
5. ຕາກສິ້ນໄໝ ເອົາຕີນສິ້ນຂຶ້ນເທິງສະເໝີ: ຕີນສິ້ນມັກອອກສີ ມັນອາດຈະຊຶມໄປທີ່ຜືນກໍເປັນໄດ້ (ຈາກປະສົບການຈິງເລີຍ)
6. ຢ່າຕາກຊຸດໄໝໃສ່ແດດກ້າ: ເພາະໄໝຈະກະດ້າງ ບໍ່ງາມ ແລະຝຸ່ຍ. ຄວນຕາກໄວ້ໃນຮົ່ມບ່ອນທີ່ມີລົມລ່ວງກໍພໍ.
7. ລີດຕອນຊຸ່ມພໍໝາດໆ: ບໍ່ຈໍາເປັນຕ້ອງສີດນໍ້າຢາລີດຜ້າກໍໄດ້ ພຽງແຕ່ລີດສິ້ນໄໝຕອນທີ່ຍັງຊຸ່ມໆ (ບໍ່ແມ່ນປຽກເດີ) ຈະຊ່ວຍໃຫ້ລີດໄດ້ແຈບດີ ແລະລຽບງາມ. ຫຼັງຈາກນັ້ນກໍເອົາໄປພຶງຕາກອີກຄັ້ງໃຫ້ແຫ້ງດີ
8. ເກັບຊຸດໄໝໄວ້ໃນຖົງສະເພາະ: ເພື່ອປ້ອງກັນຄວາມຊຸ່ມ, ຝຸ່ນໄຮຕ່າງໆ ທັງຢືດອາຍຸການໃຊ້ງານໃຫ້ຢູ່ໄດ້ດົນ.
ຂໍ້ມູນຈາກ: ວາລະສານມະຫາຊົນ
